تقدم هاشم نحوها
انت مشفتش حاجه من الدنيا ياقاسم ولا من مراتك اللي من اول ماتجوزتها وهي تعبانه وعمرها ماحسستك بطعم السعادة الحقيقيه وانا كمان اخوك سابني بدري وملحقتش اتهني معاه بشبابي.
تعالا ياقاسم نسعد بعض ونلم شملنا وكده كده احنا عيله وحده ومش غرب علي بعض بدال ماتجيب وحده غريبه لود متعرفش ممكن تعاملها ازاي..
سعاد خد راحتك ياقاسم وتأكد اني هفضل مستنياك لآخر العمر..
هي خلصت كلامها وهو سكت وانا اتسحبت من وراهم ورجعت اوضة الولاد من سكات
وانا بفكر ياتري قاسم هيرد عليها بأيه وبصراحه حطيت نفسي مكانه وشفت انه اسلم حل للولاد وليهم انهم يتجوزوا
بس للأمانه انا مكنتش برتاح لأم حسام لله فلله ولا كانت ريحها خفيفه علي قلبي ابدا مش عارفه ليه مع اني مشفتش منها غير كل خير..
ومحتار..
قربت منه وقعدت جمبه وعشان مااحسسهوش باني عارفه هو محتار ليه وبيفكر فأيه فتحت معاه الموضوع بطريقه تانيه..
ابو ود.. مالك كفاله الشړ مهموم ليه
قاسم بتنهيده فيه موضوع كده شاغلني وبفكر فيه وبحاول ارسي فيه علي قرار ياكريمه وخصوصا انه موضوع مصيري وهتترتب عليه حياة ٤ اشخاص..
بصلي ومردش وانا كملت..
تعرف يابو ود الانسان فيه حاجات مينفعش ياخد فيها قرار لوحده ولازم يشرك حد معاه فقراراته دي وياخد رأيه.
اصلا كل انسان فالدنيا لازم يكونله شريك يبقي معاه طول الوقت وفكل حاجه.. شريك حياة يشيل مع الواحد همومه ويقسم معاه احزانه ويخفف عنه
انا مقرتش ولا حاجه بس هي دي الحقيقه فعلا ولو كنت فعلا ابتديت تفكر فنفسك وفشريكه لحياتك فدا عين العقل واسمحلي ارشحلك وحده هي الانسب ليك وانت الانسب ليها
وخصوصا اني شايفه قبول منها ليك.. الست ام حسام يابو ود..
اولا هتلم لحم اخوك وتحافظ عليه ثانيا هتعفها وتعف نفسك وتبقي كسبت فيها اكبر ثواب
ثالثا بقي حسام هيبقي طول الوقت تحت عينك ومش هتكون مضطر للشحططه كل شويه بين هنا وهناك..
انهت السيدة كريمه جملتها بضعف وصمتت فطالعها الطبيب حمزه وهي تجاهد لتلتقط انفاسها
فقد تحدثت طويلا وارتعشت انفاسها فاغمضت عيناها قليلا والحقيقة انه قد بدأ يشفق عليها كثيرا فقد نال منها الاجهاد فقال لها مخففا
ايه رايك كفايه كده دلوقتي وتيجي آخدك تشوفي ود وتقعدي معاها شويه يمكن لما تشوفك تتكلم او تدي اي رد فعل ودي حاجه هتكون فصالحها وتخدمني جدا فاللي جاى.
كريمه بفرحة غامره بجد يابني هروح لود بنتي واشوفها طيب يلا بينا قوام يادكتور
تبسم الطبيب حمزه علي سعادتها وحماسها وهم واقفا وتحرك معها الي داخل مبني المشفي متوجهين الي غرفة ود التي بمجرد ان وقفت امامها كريمه حتي تصاعدت دقات قلبها بحنين واشتياق وتعالت صيحاته مع فتح الطبيب حمزه للباب وقامت بوضع يدها علي صدرها تلجم حنينها الجارف
حين لاحت لها ود من وراء الباب
وهي تجلس علي سرير صغير متقوقعة علي نفسها
واضعة رأسها علي ركبتيها بعد ان ضمتهم معا بعقد يديها حولهم
وكامل تركيزها منصب علي تلك النافذة المقابله لها
ولم تعر اهتماما للباب الذي فتح او لمن دخل منه وكأنها في عالم آخر بعقلها وادراكها ولم يتبقي منها في عالمنا غير هذا الجسد الهزيل..
دلف الطبيب حمزه الي الغرفه اولا ثم دعا السيدة كريمه للدخول بحركة من يده وما ان تقدمت السيدة كريمه خطوتين ونظرت لود عن كثب
حتي هرولت اليها في لهفة واشتياق ترجمتها دموع عينيها المتساقطه تباعا وما ان وصلت امامها حتي وقفت في صمت متأملة حال ابنتها التي لم تنجبها من احشائها ولكن حبها ولد من رحم قلبها
واعتصر قلبها ألما وهي ترى مظاهر الحياة قد فارقتها تماما ولم يتبقي منها سوى انقاض ود..
اما ود فرفرفت بأهدابها حين حجبت عنها رؤية اوراق الاشجار المتراقصه من وراء النافذه وخيم بدلا منها سوادا
فرفعت عيناها لتكتشف مصدره وما ان فعلت ذلك حتى ضمت حاجباها وتبدلت ملامحها
