قصة ماذا بعد من واقع الحياة بقلم/سماح سماحه

شركه عاديه يعنى حتى مش بنك ولا شركة بترول ولا اتصالات 
آه قصدك الفلوس والمرتب 
و ايه المشكلة 
ده حلمى وده تفكيرى عن مستقبلى من حقى ادور عن حياة أفضل ووضع احسن و إلا يبقي مالوش لازمه الجواز 
إنت عارفه آخر عريس اتقدملك كان امتى 
انت عارفه إنك خلصتى الكليه 
انت عارفه إن قعدتك من غير جواز لحد دلوقتي عامله فيا ايه 
انت عارفه انى مش بنام لانى عارف إنك هنا لوحدك مع ماما من غير راجل فالبيت 
انت عارفه انا مړعوپ عليكى أد ايه 
انت مكبر الموضوع أوى 
أنا مش اول واحده أبوها ېموت ويسيبها 
ومش عشان الأسباب دى هروح ارمى نفسي فى جوازه مالهاش أى معنى بالنسبالى 
وأنا لسه صغيره يا محمود برغم كلامك ده ماتحاولش تحسسنى انى واحده فقدت الفرص كلها
وفضل الحوار بينا بنفس الشكل لا هو قابل يفهمنى ولا انا مستوعبه منطقه الغريب 
وانتهى الحوار ب إنى بلغته انى مش هتجوز غير ب حد مقتنعه بيه حتى لو فضلت من غير جواز خالص 
طبعا فى منكم هيستغرب طريقتى مع محمود و اذاى بقف قدامه كده واجادل وارفض كلامه برغم شدته وعصبيته 
من كتر المواقف اللى مرت بينا انا وهو خناقات على اللبس والخروج والكلام فالتليفون مع صحابى والوقوف فالبلكونه وغيرها كتير فبقيت متعوده على كده و مره ورا مره بقيت مش بسكتله على طريقته الظالمه وأفكاره العقيمه 
وهو اصلآ كان بيستحملنى ويعديلى بسبب بابا
اخواتى البنات حاولوا معايا وحتى ماما بقت بتقنعنى أوافق ومحمود بيضغط بكل طريقه 
وفضلت انا على موقفى واصحابى كانوا بيشجعونى على كده 
وأنا كنت مطمنه لانى متأكده إن مهما كان طبع محمود وحش ف هو مستحيل يجوزنى ڠصب عنى
كان ب يجرحنى من غير ما
يقصد كان بيقولى 
إنت مش نفسك يبقالك بيتك وحياتك الخاصه وأطفال ودنيا جديده ذى كل البنات! !
كلامه كان بيجرحنى لانى حاسه إنى اكتر واحده فالدنيا دى نفسها فى كل ده 
نفسي أحس إنى مهمه ومرغوبه إن شالله من شخص واحد بس من اللى حواليا 
نفس أحس إن ليا دور فى حياة أى حد بدل ما أنا عشت عمرى شخصيه هامشيه مالهاش أى لازمه مجرد غلطه وخلاص 
ممكن تستغربوا كلامى بس انا كنت جعانه جدااا للاهتمام 
كنت عايزه حد يحسسنى بوجودى مش ذى ما أنا حاسه إنى شخصيه شفافه محدش شايفها
بعد كام أسبوع بطلوا اهلى يفتحوا موضوع ابن عمى الحمد لله 
وبعدها ب شويه خلص الإمتياز وفضلت مستنيه التكليف بفروغ الصبر من كتر الزهق والملل والحابسه اللى كنت عيشاهم
واستلمته الحمد لله 
ومع اول ايامى فالتكليف اتعرفت على د ايهاب 
طبيب الاسنان الوسيم عندنا فالوحدة
طبعا طبعا طبعا بدأ عقلى الباطن سريعا فالتعامل مع د ايهاب 
وبدأت احلم واترقب كل حركاته وهمساته على أمل انى أحس منه ب أى بوادر إهتمام
زعلت جدا فالأول لما عرفت من زمايلى انه مش بييجى كتير بسبب إن سيادته فاتح عيادة والعيادة شغالة كويس ف حضرته مش فاضي ييجى الوحده ومش بيهمه لا مرور ولا جزاءات وبيعرف يمشي حاله
بس بعد كام أسبوع الكل لاحظ أنه بقي بييجى الوحده كتير وكمان بقي يقعد معانا لما نتجمع سوا فالصيدليه لما الشغل يهدى ويقل 
بس معتقدش إن حد غيرى لاحظ نظراته ليا اللى كان بيحاول يداريها على أد ما يقدر 
بس انا طبعا كنت مركزه عشان كده خدت بالى 
ده غير اسالته عنى اللى كان بيدخلها فى وسط الحوار وتبان على أنها كلام عادى يسأل مره عن والدى ومره عن اخواتى ومره عن طموحى وهكذا 
طبعا انا فالفتره دى كنت طايره لوحدى كده فى غيمة ورديه وجميله لمجرد انى حاسه ب إهتمامه واعجابه بيا 
وبدأت انتظر بمنتهى الصبر اليوم اللى هيكلمنى فيه بصراحه ويظهر نيته
واليوم ده مااتاخرش كتير 
لقيت موبايلى بيضرب وأنا كنت فالبيت بعد ما رجعت من الوحده بحوالى ساعتين 
اليوم ده كان إيهاب موجود فالوحده ومش عارفه أن كانت تهيؤات وللا لأ بس انا حسيته وكأنه فضل يبصلى معظم الوقت لدرجة إنى كنت خاېفه حد ياخد باله
كنت مسجله رقمه عندى بس ماستخدمتوش قبل كده ولا هو اتصل بيا قبل كده 
وبرغم انى شجاعه وجريئة ذى ما بيقولوا عنى اصحابى بس صدقا بقيت خاېفه أرد عالتليفون 
خاېفه اټصدم وتطلع توقعاتى غلط 
وخاېفه من رد فعلى لو طلعت توقعاتى صح
توكلت على الله ورديت
السلام عليكم ورحمة الله وبركاته 
وعليكم السلام ورحمة الله وبركاته د خديجة اخبارك ايه 
الحمد لله 
آسف عالازعاج واسف لو كان اتصالى هيضايقك 
يا عم أنجز الله يخليك لا أبدا مفيش إزعاج خير يا دكتور 
بصراحه انا مابقتش عارف ايه الصح والمناسب اكتر إن كنت يعنى اتصل بيكى واكلمك أنت الأول وللا اخليها رسمى واكلم اخوكى 
طبعآ انتم ممكن بسهوله تتخيلوا إحساس واحده ذيي وكأنها سمعت أحلى كلام فالدنيا مع إنه لسه يعتبر ماقالش حاجه بس انا كنت واثقه فى ربنا إنه مش هيخذلنى والله العظيم عنيا دمعت وقتها أول مره فى حياتى اتمنى حاجه وتحصل أخيرا حياتى الفاضيه الممله هتتملى أخيرا حد حس بيا وبوجودى أخيرا بدأت أحس ب انوثتى اللى كنت بدأت أشك فيها 
د خديجة انت سمعانى 
أحم أيوه انا مع حضرتك 
بصي انا فعلا يمكن مش عارف أجمع كلمتين على بعض يمكن عشان دى اول مره اعمل حاجه ذى كده ف يعنى احسن اتكلم بصراحه أنا بقالى فتره معجب بيكى جدا يمكن بجد من أول ما استلمتى شغلك عندنا 
مش قادره أبطل دموعى نازله لوحدها وخاېفه اتكلم يفهم انى بعيط 
_اوك بصى هو أفضل بالنسبالى انك ماترديش عليا عشان اقدر اقول الكلمتين اللى بجهزهم بقالى كام يوم 
خديجه انا عايز اجى اتقدملك لانى نفسي انا وانت نكمل حياتنا سوا بإذن الله كل صفه بشوفها فيكى كل يوم بتزود إعجابى بيكى وأنا كنت محظوظ إنك لسه ماتخطبتيش لحد دلوقتي ف انا مش هستنى تانى لحد ما الاقيكى فجأه لابسه دبلة حد غيرى 
يا اللله الحمد لله بس أرد
عليه اذاى دلوقتى وأنا بالوضع الاهبل ده 
_ خديجه! !
_ أحم نعم 
حمدالله عالسلامه 
ابتسمت وأنا بعيط تخيلوا! ! 
_ بما إننا كبار وبنشتغل سوا كل يوم تقريبا ف انا فكرت اكلمك انت الأول بصراحه ماحبتش أتقدم ليكى بشكل تقليدى بقي وجواز صالونات وكده 
وبجد كنت ھموت واتكلم معاكى واقولك اللى جوايا بس دلوقتى انا عايز رقم اخوكى عشان اكلمه ده يعنى لو إنت ماعندكيش مانع شخصي بالنسبالى مبدءيا 
هبعتلك رقمه فى رساله تقريبا قفلت في وشه السكة
الأمل 
وما أجملها من كلمه 
كلمه تساوى تفاؤل 
كلمه تساوى مستقبل قريب جميل 
ولكن تبقي مجرد كلمه 
ويبقي الأمل مجرد أمل غير مضمون الحدوث 
هههههههههههههههههه 
قفلت التليفون وأنا متوقعه شكله ورد فعله 
بس مش مهم انا كان مستحيل اخليه